أعتقني ..
أعتقني ، مشكلتي لا في دين لا في هوية
أعتقني ، كلنا توانسة وتفريقنا ماهوش حرية
أعتقني، كلنا توانسا وتجمعنا فرد ثنية
أعتقني مانيش باش ننسى القضية
أعتقني ، دم الشهيد ماهوش شوية
أعتقني ، ثورتنا مش ثورة ياسمين وبورجوازية
ثورتنا ، ثورة كرامة ودم الشهيد اللي في كل ثنية
أعتقني ، ثورتنا ثورة البطالة و المهمشين والناس المنسية
أعتقني ، تونس ليك ، تونس ليا
تونس للناس الكل وتجمعنا فرد ثنية
أعتقني شعاري كان وباش يبقى ،
« شغل حرية كرامة وطنية»
أعتقني ،
أعتقني مالتهميش و الفقر والأمية
أعتقني من الهم والبطالة و الميزيرية
أعتقني من غلا العيشة و المديونية
أعتقني من التعذيب والقمع وغاز ومتراك البوليسية
أعتقني من الإهانة والذل والتبعية
أعتقني من الظلم ونارو اللي تنهش فيّا
أعتقني، شبابي ضايع في المستنية
أعتقني من اليأس والحرقة والبحر اللي يقتل فياّ
أعتقني من عمري اللي ضاع عليّا
أعتقني من الدنيا اللي ضاقت بيا
أعتقني من الظلمة اللي عشّشت فيا
أعتقني من الحرمان و الدمعة اللي في عينيا
أعتقني من الحسرة والغصة اللي عايشة فيا
أعتقني من الذل وكرامتي اللي ضاعت عليا
أعتقني ، خليني نخرج من سفينة الذل اللي غرقت بيا
أعتقني ،هاذي أول خطاويا للحرية
لا للتقسيم لا للتفريق
!بعمري ما نبيع القضية
---------------
Aly Ben J
Aucun commentaire:
Enregistrer un commentaire